أشعار

ياسلسبيل
العقيلى
الشاعر أحمد العقيلى
مدة أيديا
كانت عليكي
أول مرة مش حرام
أنا أه أنتشيت
لكن ما أشتكيتش
عشان يفتوا عنك
من فتاوي رخص العنعنة
قال أن عنيها لو تسكر
يبقى حبها حرام
إن سمحت سيدنا
بص في ورق دينك
سلسبيل دي في ديني أنا
أنا اللي أسن
في شرع القرب منها
أمتى تنز عنبها فيا
وأمتى أعتتقها
وأمتى أصب منها
جوه كاسي
كام جرام
مفتي الديار
أصله لو داقها
كان حرق الورق
اللي أتكتب فيه
هل يجوز
علي اللي زيي
حكم شهر إعدام
**********************
شعر الربيع طارح
عماد
أشعار عمدة
الربيع ف الحب طارح
والورود زاينه المطارح
والامانى
والاغانى
والتهانى
والامال
والسنين بالحلم تفرح
والسلام ع الارض مال
والتراب يصبح شقاوه
من هزار حبة جبال
والعبير
يسرح بكيفه
والنسيم
يمشى بدلال
والليالى تيجى جمعا
فرحانين زى العيال
والشعاع يحضن شموسنا
فوق كتافها كأنه شال
والحرام ياخد له ساتر
تحت رجلين الحلال
والخضار كحل وادينا
والصفار حاضن تلال
والشعور نازز حلاوه
والوجود معجون جمال
يبقى بالتأكيد هشوفك
مش مجرد احتمال
**********************
شعر فاكرانى يامه ؟
رائد
أشعار رائد أبو الشيخ
فاكرانى يامه ؟
فاكره صوتى وصرختى
فاكرانى يامه يوم مادبلت وردتى
فاكرانى يامه يوم ما وقفت سكتى
فاكرانى يامه .. فاكره عينى ودمعتى
وسط الزحام شاورت لك بُصّى عليّا
وسط الزحام شاورت لك تعبت عنيّا
وسط الزحام ناديت عليك بعلو صوتى
وحشاني يامه
فاكرانى يامه ؟
عايزك معايا تسندينى في محنتي
عايزك معايا تنوري لي سكتي
عايزك معايا .. عايز حنانك وحُضن عينك
وحشاني يامه
فاكرانى يامه ؟
راحت ليالي المسك والطُهر الجميلة
راحت ليالي كنت بحسبها طويلة
راحت ليالي وغاب قمرها ونور سنينى
وحشاني يامه
فاكرانى يامه ؟
**********************
من ديوان محدش غيري
عتريس
الشاعر أشرف عتريس
هل قلت لك قبل سابق
إن لحظة بنتي عينيها ما تضحك أبقى هزمت عناد الدنيا
لو حددت ملامح وش حبيبتي الغايبه أبقى فتحت في قلبي طاقات الشوف
لما عيال من جيلى تزاحم بعض وتسكن قلبي أبقى نجحت بدفع الذات
لما أشوف سبحة جدي بتنفى لحظات الشك عندي وحلم النبوة الكداب
فأبتدى الترتيل من أول وجديد بنفسي
لما واحد في سني يحلم زى العيال
أبقى لسه قادر ع الغنا والخيال زى ما قلت لك قبل سابق
انى لسه براهن لغاية ما أموت
وما يهمنيش التحالف المؤقت مع الطمان والهدوء
**********************
بيعلّموه الغنا
مراد
الشاعر مراد ناجح عزيز
بيعلّموه الغُنا
قال : ولمين يكون الغنا ؟
والحزن قاطع طريق بينا
وبلاد تشيلنا وبلاد تحط
والفرحه فار والف قط
بيطاردوه
لمين يكون الغُنا وازاي هتعلّموه ؟
قافلين كتاب المودّه .. بإيد
وإيد بتقطع ف ورده
وبتزرع تعب وسكوت
يا بكره ياوجع الغلابه ف القلب
صوره وصوت
فتش ف جلدك عن بيوت
واقفه علي حيلها
حاول تحايلها
بالألوانات
بالممكنات الممكنه
أدخل لكل الأمكنه
وإن لقيت الفرح لسه ع الطبالي
والرقص كان شرط الغُنا
أرقص وحزّمني
وانا غصب عني لو تعلمني الموت
أموت
مش بس أغني
**********************
نوح الغناوي
مينا
أشعار : مينا ناصف
نترسم ملامح وجع
نمشى ع المقادير
من وجعنا أتوجع
وطالت بينا المشاوير
صوت كلامنا المقسوم
صوره وجع مرسوم
وملامح فيها سارح
صريخ ألم مكتوم
وليل طويل متلتم
وحنين جوانا متلجم
وغراب نوحي يندبنا
سهم الوجع يصبنا
تزعق فروحي جروحي
وأن قلت قالوا ناصيبنا
ُمر الكلام ف جوفنا
غرقان ف بحر خوفنا
وكننا ف قلب العدم
تتقل خطاوي القدم
ومن جدورنا يقطفنا
يعود الطير ينعق
زمن الحقايق يزعق
وتوه منا الخطى
يا قلوبنا يا متحوطه
من كل جيهة بالخطا
يا حبيبتى إحنا دوبنا
يا حبيبتى إحنا دوبنا