انت شوفت الوجع فين يابنى ؟؟ الوجع الحقيقى انا اللى شوفته :كتب اللواء ربيع الحسيني

اكرر.. واعيد.. ولا أكل او امل من الاعاده
كل الحكايه .. اليك ولدى اكتب

اليك يا ولدى انت شوفت الوجع فين يابنى ؟؟ الوجع الحقيقى انا اللى شوفته … انا واخواتى اللى كننا بنذاكر على لمبه جاز عشان نوفر ف الكهربا .. انا الى كانت امى تبشر الصابون ف البيت عشان تغسل بيه بدل الرابسو.. انا الى وقفت فى طابور عريض عشان اخد فرخه كل شهر من الجمعيه ع البطاقه.. انا اللى اكلت وشربت على البطاقه زى كل المصريين فى نكسه 67 .. انا اللى امه راحت حطت دبلتها وغويشتها الوحيده تبرع للمجهود الحربى .. انا اللى اخوه الكبير بعد الثانويه العامه سنه 67 اختفى مش عارفين له مكان 63 يوم .. وفى الاخر لقيناه جاى لابس بدله الكليه الحربيه .. لما اتوجع من الهزيمه ..مستحملش على كرامته ..انا اللى امه كانت كل يوم تاخده ويروحوا يودوا اكل على قد ما قسم . للى ف المستشفى القبطى اللى جنبنا لمصابين الحرب .. انا اللى امه لبست اسود من يوم 7 يونيو 67لحد 6 اكتوبر 73 رغم ان ملناش شهداء .. بس شاركت امهاتهم بالوجدان .. انا اللى شوفت الاعلام السوده على كل بيت بيقول ان فيه شهيد ..انا اللى شوفت العساكر راجعين من الجبهه حافيين ومصابين انا اللى شوفت الحزن والدموع فى وش كل مصرى ايام النكسه .. انا اللى شوفت العساكر بتتهان ف الشوارع عشان انهزمنا .. انا اللى شوفت ام بتضرب ابنها وهى بتلطم لانه هرب من الخدمه وقت الحرب .. وبتقوله هاموتك واموت نفسى عشان انت عار.. انا اللى سمعت اصوات صفارات الغاره فى كل مكان ف اسكندريه وقت الحرب .. انا الى عشت فى الضلمه ..كل ما ييجى الليل ونطفى النور وندهن القزاز ازرق وكشافات العربيات تدهن ازرق عشان الغارات.. كانت ضلمه غصب عننا .. انا الطفل اللى كنت بجرى مع الرجاله فى الشوارع وقت الغاره اصرخ ( طفى النور ).. انا اللى شوفت اهالى القنال وهما بيتهجروا من بيوتهم وقت الحرب .. انا اللى شوفت البنات .. البنات .. البناااااات .. لابسين لبس (الفتوه) وبيتدربوا على حمل السلاح مع شباب الدفاع المدنى.. انا اللى شوفت شوراع مصر كلها مكتوب على حيطانها تسقط اسراAAAئيل.. انا الى شوفت الناس بتصرخ وتجرى فى الشوارع بعد ما تحمل ناصر مسؤليه الهزيمه وقرر التنحى .. بترفض انه يتخللى عنهم .. انا اللى كنت بروح مدرستى الابتدائيه زى كل الولاد والبنات حاطط شريطه سوده على دراعه .. تعبيرا عن الحزن .. وانا اللى قريت وسمعت عن حرب الاستنزاف فى وقتها والعمليات الفدائيه ف العمق الاسرائيلى .. وشاهدت بكاء موشى ديان وجولدا مائير على الشاشات فى السينما .. انا اللى شوفت جنازه عبد الناصر وشوفت كل مصر بتبكى وتصرخ .. وملايين خرجو ا ف جنازته فاقدين الامل ان مصر تقوم من تانى .. وانا الى سمعت الجماهير فى كل مناسبه بداعى وبدون داعى بتهتف هنحارب .. هنحارب ,و بيقووا بعض ببعض .. وبيشدوا حيل بعض ببعض .. انا الى اتريقت وانا طفل على السادات عشان كل سنه كان بيقول انه عام الحسم ومش بيحارب .. انا اللى يوم 6 اكتوبر 73 .. شوفت السما كلها بترعد بطيارات من كل الانواع فى السما .. انا اللى شوفت البوابات الخلفيه لمطار الماظه خليه نحل.. انا اللى شوفت الطريق كله فاضى لحركه القوات المسلحه فى الطريق لسينا الحبيبه نجيب النصر.. انا اللى دوقت مرار الهزيمه .. ودوقت حلاوة النصر وانا اللى شوفت الهزيمه يابنى فى ست ايام .. وانا برضه اللى شوفت النصر فى ست ساعات.. وانا اللى استوعبت الدرس .. ان ما اخذ بالقوه لا يسترد بغير القوه .. وانا اللى اتعلمت ان القوه الحقيقيه فى التسليح والتدريب ,, تكسب احتترام العالم . وان انا فى امان طول ما الجيش المصرى قوى وبخير
كل عام وقواتنا المسلحه بالف خير وسلام .. رحم الله شهداء الوطن
; انا يابنى .. انا المجاهد العسكرى المدنى الصابر على النصر .. مهما كانت التضحيات انا المصرى

ربيع الحسينى