تحقيق ـ وليد ضاحى
الفواعلية هم عمال اليومية ، عدد كبير من أبناء مصر لا حول لهم ولا قوة ” يوم فيه و10 مفيش ” حقوقهم ضائعة . ولكن هل ستساعدهم الحكومة على إعانة أسرهم ؟
تجولت جريدة ” الإعلاميين اليوم ” في بعض المحافظات والتقينا بعدد كبير منهم .
عماد سليمان من أبوقرقاص ـ محافظة المنيا يعمل مبيض محارة
عندي 39 سنة ومتزوج ومعي 3 بنات في مراحل التعليم المختلفة . كل يوم أحضر من قريتي الصغيرة إلى هنا على الكوبري أقف بالساعات وهو المكان الذي يتواجد به العمال بشكل يومي ومعروف لكل أهل البلد . ليس لي مصدر رزق آخر والشغل بقى ضعيف جداً وخاصة بعد نزول عدد كبير من ليبيا .
في محافظة الجيزة التقينا عم صالح مسن
أنا من الفيوم و أحضر إلى هنا في الجيزة كل يوم سبت لكي اشتغل في المعمار و إذا وفقني الله بعمل أقوم به ثم أرجع لأولادي يوم الخميس و إذا لم أوفق ارجع الأسبوع اللي بعدة عشان لازم ارجع لأولادي و معي فلوس والله يا بني الحال بقى غير الحال والدنيا بقت وحشة .
ونحن مع عم صالح أقبل علينا معوض صارخاً وقال يا أستاذ إحنا محدش يعرف عننا حاجة إحنا مش محسوبين على البلد إحنا اقل ناس وليس لنا حق في أي شي إحنا غلابة ليس لنا تأمينات ولا معاش و إذا حدث لنا أي شي مثل إصابات أو إذا تعبت شوية وقعدت في البيت ما بلاقيش لقمة العيش وأنت عارف الواحد عنده عيال . إحنا على الله و مفيش حاجة شهرية إحنا ناس رزق يوم بيوم والنصيب على الله .
في ميدان نصر الدين بالجيزة تقابلت مع ( ح . ع . ع ) ويقول :
أنا متعلم ومعي شهادة وكان عندي حلم أن أجد وظيفة ، بجري هنا وهناك و أقدم أوراقي في كل مكان بس في الآخر زى ما أنت شايف بشتغل عامل في المعمار عشان ألاقى أكل العيال و ياريت بلاقى . إحنا بندور على التعب ومش لاقين .
في ميدان أبوريش بحي السيدة زينب بالقاهرة التقيت بالسيد ( م . ف . ح ) يقول :
معايا دبلوم وبشتغل عامل يومية بـ50 جنية في اليوم لو كان فيه شغل . مصاريفي 10ج يبقى معايا 40ج متزوج ومعايا 4 أولاد مصاريف كل واحد منهم 5ج كل يوم عشان المدرسة وبدفع 400ج إيجار سكن . ده غير المياه والكهرباء فين الحل يا حكومة . أنا عايش بستر من الله .
في منطقة فيصل التقيت بـ )م . خ ) يعمل بنّاء
عندي 45 سنة متزوج ومعايا 4 أولاد منهم 2بنات و2ذكور وكلهم في المدارس . معرفش اشتغل حاجة غير بنّاء ومفيش شغل والحال واقف على الأخر . ربنا يستر علينا . سيبنى في حالي الله يكرمك الواحد مش عارف يعمل ايه فى البلد دى .
وكان معنا الحاج ( م . ك )
أنا عندي 50 سنة و أعيش أنا و زوجتي و أولادي وبشتغل بنّاء . كان زمان في شغل لكن دلوقتى الصنعة ضاعت والفلاح ترك الأرض ونزل القاهرة وما فيش وظائف للشباب وارتفاع سعر مواد البناء ورفع سعر متر الأرض مشاكل كتير يابنى . كتر خير الحكومة هتعمل ايه . البلد حالها زى الزفت والإخوان خربو البلد ومش عايزين يسبوها للناس اللى فاهمه تديرها كويس . بس لي رجاء ياريت الحكومة تنظر لعمال اليومية الغلابة
والتقينا مع محمد . عامل يومية يقول :
كان معايا واحد عامل من الفيوم اسمه على ، وأثناء الشغل سقط فى بئر الاسانسير وتوفاه الله . تعرف يا أستاذ أيه اللى حصل ، صاحب العمارة قال : قضاء وقدر ونصيبه كدا . ودفع إلى أولاده 30 ألف جنيه ، يعنى سعر الواحد مننا 30 ألف . أحب أوجه رسالة إلى كل مسئول . هل فعلاً عُمال اليومية مش محسوبين من البلد ؟ هل سعر الواحد مننا 30 ألف زى ما دفع صاحب العمارة لأبناء العامل المتوفى ؟
وبهذا نكون قد عرضنا جانب من معاناة فئة مصرية هي فئة الفواعلية . والجريدة تضم صوتها إلى عمال اليومية
ونتوجه إلى المسئولين فى الحكومة وندعوهم إلى النظر والرعاية لمثل هؤلاء .